«Պետական նպաստների մասին» ՀՀ օրենքում 25.06.2020թ. կատարված լրացումներով մինչև երկու տարեկան երեխայի խնամքի նպաստի իրավունք են ձեռք բերել Հայաստանի Հանրապետության բնակչության պետական ռեգիստրում գյուղական բնակավայրի հասցեով հաշվառված և փաստացի բնակվող ծնողները, մինչև երեխայի երկու տարեկանը լրանալը, եթե երեխայի ծննդյան կամ խնամքի նպաստի համար դիմելու օրվա դրությամբ առնվազն մեկ տարի անընդմեջ հաշվառված են եղել գյուղական բնակավայրի հասցեով:
Գյուղական բնակավայրում բնակվող ծնողին խնամքի նպաստ նշանակելու համար հիմք են հանդիսանում բնակչության պետական ռեգիստրի տվյալները` ծնողի և երեխայի հաշվառման (բնակության) վայրի և ժամկետների վերաբերյալ:
Օրենով սահմանվել է, որ գյուղական բնակավայրում բնակվող ծնողին խնամքի նպաստը նշանակելու դիմումը պետք է ներկայացվի մինչև երեխայի երկու տարին լրանալը:
Հաշվի առնելով այն հանգամանքը, որ գործող օրենսդրությամբ չաշխատող մայրերին ևս հղիության և ծննդաբերության արձակուրդի իրավունք ունենալու ժամանակահատվածի համար տրվում է մայրության նպաստ, ուստի գյուղական բնակավայրում խնամքի նպաստը նշանակվում է երեխայի 70 օրականը լրանալու ամսվան հաջորդող ամսվա 1-ից: Այս դեպքում անհրաժեշտ է, որ ծնողի` գյուղական բնակավայրի հասցեով հաշվառվելու մեկ տարին լրացած լինի մինչև երեխայի ծնվելու օրը, իսկ դիմումն ու անհրաժեշտ փաստաթղթերը ծնողի կողմից ներկայացվեն երեխայի 70 օրականը լրանալու ամսվան հաջորդող տասներկու ամսվա ընթացքում:
Այն դեպքում, երբ գյուղական բնակավայրի հասցեով հաշվառվելու մեկ տարին լրանում է երեխայի ծնվելու օրվանից հետո, ապա նպաստը նշանակվում է գյուղական բնակավայրի հասցեով հաշվառվելու մեկ տարին լրանալու ամսվան հաջորդող ամսվա 1-ից: Այս դեպքում դիմումն ու անհրաժեշտ փաստաթղթերը ծնողի կողմից պետք է ներկայացվեն գյուղական համայնքում հաշվառվելու մեկ տարին լրանալու ամսվան հաջորդող տասներկու ամսվա ընթացքում:
Եթե դիմումը և անհրաժեշտ փաստաթղթերը ներկայացվեն նշված տասներկուամսյա ժամկետը լրանալուց հետո, ապա նպաստը կնշանակվի դիմելու ամսվան հաջորդող ամսվա 1-ից:
Եթե խնամքի նպաստը նշանակվել է ծնողի՝ գյուղական բնակավայրի հասցեով հաշվառված լինելու և փաստացի բնակվելու հիմքով, ապա խնամքի նպաստ ստանալու իրավունքը դադարում է՝
ա. Հայաստանի Հանրապետության բնակչության պետական ռեգիստրում երեխայի և ծնողի` այլ (գյուղական բնակավայր չհանդիսացող) բնակության վայրի հասցեով հաշվառվելու (փաստացի բնակվելու) դեպքում,
բ. երեխայի կամ ծնողի` հաշվառումից դուրս գալու և գյուղական բնակավայրի հասցեով մեկամսյա ժամկետում կրկին չհաշվառվելու կամ այլ բնակության վայրի հասցեով հաշվառվելու դեպքում,
գ. երեխայի` Հայաստանի Հանրապետությունից անընդմեջ 90 օր և ավելի ժամկետով բացակայելու դեպքում.
Մինչև երկու տարեկան երեխայի խնամքի նպաստի չափը, այն նշանակելու և վճարելու կարգը սահմանվում է ՀՀ Կառավարության 29.12.2015թ.-ի N 1566-Ն որոշմամբ:
Վերջում նշենք, որ գյուղական բնակավայրում բնակվող ծնողին խնամքի նպաստ նշանակելու և վարելու վերաբերյալ դրույթները տարածվում են այն դեպքերի վրա, երբ երեխան ծնվել է 2020 թվականի հուլիսի 1-ին և դրանից հետո: